يا مكان يا مكان

يا مكان يا مكان

تابعوا الحوار ولا تعليق
ملحوظة : حدث هذا الحوار الساعة الثالثة إلا ربع فجرا

شريف : مامى احكيلك حدوتة
أنا : احكي يا حبيبي
شريف : يا مكان يا مكان كان فيه مرة أسد كبييييير أد كدة هه وكان فيه زرافة صغنونة عشان مش بتاكل مم
وانا شوفت الحناوات الطويلة مع زيزى والزرافة ماتت فاكر بقى يا مامى
انا : اه يا حبيبى فاكرة
شريف : وجدو جمال عمل فيل بالصلصال فاكر وعمل مكنسة وسلم كمان ، وانا بقى رحت الحضانة بكرة ولعبت مع صحابى
انا : ولعبت مع إسراء ؟
شريف : لأ إسراء وحشة عشان مش بتاكل اكلها ومس هدى هتوديها فصل البيهيهات ، بس انا بحب انس وعمر يحيى وعمر رشاد وندى ورنا ، وإحنا هنروح الجنة وربنا مش زعلان مننا علشان احنا بناكل مم كويس ، وخديجة الجمال ركبت باص عم سيد ، وعبد الرحمن مانته خدته واحمد مسعد صاحبى واحمد ابو طالب صاحب بابى ، مامى يلا العب معايا بطن يعنى ايه
انا : ماشى يا عم ها بطن يعنى ايه ؟
شريف : بطن يعنى ستومك
انا : وأرنب يعنى ايه ؟
شريف : أرنب يعنى رابت والراجل كان بيقول رابت رابت رابت فى الكرتون
مامى عايز اشوف توم وجيري على الكوميتيتور
انا : بس الكمبيوتر نايم يا شكشوكة
شريف : لأ الكوميتيتور صاحى بس انت دوس على الزرار هو يبقى صاحى
انا : لأ يا شريف الكمبيوتر نايم علشان احنا بليل ولازم ننام كلنا
شريف : طب انا عايز اجى فى حوضنك
انا : تعالى حضنى
شريف : تصباح لا خير يا مامى
انا : وانت من اهله يا حبيبى
شريف : ماما بس انت متنمش خلى عينك صاحى
انا : ليه يا شريف انا تعبانة وعايزة انام
شريف : ماشى انت نام مافيش مشكلة بس خلى عينك صاحى
انا : بس عينى كمان عايزة تنام
شريف : لا خلى عينك مفتوحة عشان انا هحكيلها حدوتة
انا : ماشى يا شكشوكة
شريف : يا مكان يا مكان كان فى فيه أرنب يعنى رابت بياكل تفاحة يعنى ابل ، مامى فتح عينك ، وبعدين الدكتور اداله حقنة فى الأظؤظة ، مامى فاكر لما انا جبت الزمزمية بتاعتى الجديدة من هيبر وان
انا : نام بقى يا شريف
شريف : بس احنا عايزين نروح كارفور ، مامى احكيلك حدوتة
يا مكان يا مكان كان فيه توك توك عمل حادثة وراح عند الميكانيكي والراجل بيصلحه و زعقله وقاله امشى إسمال انا هامشى لمين ..................................... و تصبحوا على خير

شريف كان عنده 3 سنين و3 شهور إلا 3 أيام

( أم شريف )

سبتمبر 2007

معاني الكلمات
الحناوات : الحيوانات
مانته : مامته
البيهيهات : البيبيهات
الكوميتيتور : الكمبيوتر
إسمال : شمال
لمين : يمين
يا مكان يا مكان : كان يا ما كان
رحت الحضانة بكرة : رحت الحضانة إمبارح