عشان انت مصرى... لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الأغانى
بتاع الحضارة وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدأ فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش مية تشطف صابونة فى إيديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصلة
أدى المترو واقف وكهربته فاصلة
وفى الميكروباص خناقة وحاصلة
أوتوبيس فرامله عايزالها وصلة
وتوك توك ده تايه ومحتاج لبوصلة
بتوصل لشغلك بدم اتحرق
فى زحمة وكتمة وحر وعرق
رئيسك سايبلك كومة ورق
ده غير دمغة ضايعة وملف اتسرق
وفيه كام مواطن عامللك قلق
بيشكى تقول له روح اندعق
وعركة وهوجة وشاى اندلق
ومخك خلاص م الصداع اتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تِهاتى ياناس اتهريت
ولا حد سامعك مهما هاتيت
عشان انت مصرى وده للاسف
فلازم تقاسى تعيش تتقرف
وكل الأساسى فى حياتك ترف
فتنسى الكرامة وتنسى الشرف
وتسرق وتنصب أو تنحرَف
ودمعك بيجرى وجرحك نزف
ahmed elmoslimany
كيف تصنع ثلج فى ثوانى ؟؟؟ 
كيف تضع بيضه فى زجاجه ؟؟؟ 
هناك تعليقان (2):
ده حال المواطن البسيط الغلبان في كل
مكان من الأوطان مش بس في مصر. والله يكون في عون الغلابة جميعهم.بس لاحظو معي لو كل غني في هذه الدنياأدى زكاة ماله وكل مقتدر تصدق على الفقراء ولو كنا متكافلين ومتعاطفين مع بعض ماكان بقي فقير ولا غلبان في هاالدنيا. مارأيكم؟
بسم الله الرحمن الرحيم
الى الاخ الفاضل الاستاذ احمد المسلمانى احيه على برنامج الطبعه الاوله لكن والله اذا سمحت لى ان اقول لك ان الاسم لا ينطبق على الاحداث التى تقدمها يجب ان تسميه الحقيقه المره لان عندما اشاهدهذا البرنامج فعلا احس بالاوضاع الصعبه فى مصر وانت تعلم ماقميت مصر كما قال عليها د/ محمد البردعى كانت الدولة القياده وقدوت كل الدول اما الان فى المواخره {الترسو } يا اخ احمد ان مصر امانه فى اعناق المسئولين ؟؟؟؟؟؟؟ وان كانو لا يرفون الاخره وان كان لا يومنون بالامانه فحسنى الله ونعم الوكيل ااااااااااام بلنسه للشب فهو من اطيب الشعوب (( يا اخى الفاضل جاهد فى نشر الحقيقه لعلا وعسى ان الانانيه تخرج من قلوب البشر ويعلمون ان الحق والضمير هما اساس المجتمع والله ان شا الله مصر ااااااااااااممممممممممممم النيا وستظل امها ولكل ظلمه نهايه ولكل محنه نهايه ولكل نجاح بدايه والسلام عليكم ورحمة الله
إرسال تعليق